المحاضرة 4 : قصة اصحاب الجنة

بسم الله الرحمن الرحيم

احنا المحاضرة اللى فاتت خلصنا قصة قابيل وهابيل ولاد سيدنا ادم عليه السلام

قصة النهاردة ان شاء الله تبدأ بكلمة ، فى حاجة اسمها الرسائل الربانية يعنى ايه ؟

ربنا بيرسل لعباده رسايل فى حياته فحياتنا مليانة بالرسايل الربانية طب ليه ربنا بيرسل لينا رسايل ؟


فى ناس بتكون ماشية كويس فى طريقها ، ومرة واحدة بتنحرف عن طريقها فربنا عايز يرجعها للطريق تانى ، قد تكون رسائل عقابية ، وقد تكون رسائل إصلاحية ، قد تكون رسائل عنيفة مؤثرة جدا ، بس كل واحد فينا ربنا بيبعتله رسائل ربانية ، طب ليه دا كله وربنا بيعمل معانا
كدا ليه ؟

يقول الله تعالى : ( والله يريد أن يتوب عليكم )

فربنا بيبعتلنا رسايل لينا عشان نفوق ونصحى ونمشى فى طريقه ونقرب ليه ، ومش نمشى مع الشيطان والرسايل الربانية نوعان :
رسائل عامة : للناس كلها زى ( الأنبياء - الكتب السماوية - الكون وشكله (
وفى رسائل خاصة ( ليكى انتى وليا ولكل الناس على حدة (

والناس نوعين :

- فى ناس سريعة الفهم فتفهم رسالة ربنا اللى عايز يوصلها ليه بسرعة
- وفى ناس بطيئة الفهم

خلى بالكم الرسائل دى اوقات بتكون واضحة جدا زى موت صديق او حبيب او معصية تحصل وراها مصيبة كبيرة فانتا تقول ان المصيبة دى عشان المعصية الفلانية ، وتفهم كدا وتربط الاتنين ببعض ودى رسالة واضحة

طب ايه تانى :

مثلا يكون رزق كان جايلك فيقف عشان ذنب او معصية عملتها فتقول دى عشان دى

وفى ايضا رسائل مخفية يعنى ايه ؟
يعنى مش اى حد يجيبها
مثلا :
تقع عينك على فقير معدم فى الوقت اللى الناس كلها بترمى فيها نعمة ربنا ، او تقع عينك على واحد مسكين فى الوقت اللى انتا مستهتر بعطاء ربنا ومش راضى وغير قنوع ، طب لو ربنا قعد يبعتلك رسايل من عنده وانت مش راضى تفهم ، ايه اللى يحصل ؟

يتحول الموضوع إلى غضب وانتقام من الله عزو جل ، طب انا اعرف ازاى اذا كانت دى رسالة من عند ربنا او لا تشوف بعدها لو اتصلحت حياتك تبقى دى كانت رسالة من ربنا ، لو اتحسنت حياتك تبقى دى رسالة من ربنا الحمد لله انا عدت لطريق الله وربنا مش غاضب منى

طيب ندخل على القصة بتاعت النهاردة :

القصة عبارة عن رسالتين ربنا باعتها لينا وللناس اللى هحكى قصتهم النهاردة

الرسالة الأولى :

اوعوا تعيشوا لنفسكم ونسيب الغلابة ، اوعى تكون انانى وتنسى الغلابة والفقراء
خلى بالك ( لا يجتمع شح وإيمان فى قلب عبد (

طب الرسالة التانية :


اوعوا تخونوا ابوكم بعد ما يموت ، اوعى يكون ابوك بيعمل خير فى الدنيا وبعد وفاته
تمنع الخير دا ، اوعى تغير سكة ابوك بعد ما يموت عرفتوا هتكلم عن مين ؟

هتكلم عن قصة اصحاب الجنة الموجودة فى سورة القلم من الأية 17 – 33 السورة مكية
ونزلت فى اغنياء مكة اللى مش بيعطوا الغلابة

تقول الأية :

إِنَّا بَلَوْنَاهُمْ كَمَا بَلَوْنَا أَصْحَابَ الْجَنَّةِ إِذْ أَقْسَمُوا لَيَصْرِمُنَّهَا مُصْبِحِينَ (17 )

صدق الله العظيم

وكلمة بلوناهم : اختبرناهم بالغنى ، مين هما : اغنياء مكة

قصة اصحاب الجنة :

قصة 3 اولاد ذكور ورثوا عن ابوهم رجل الأعمال الغنى الناجح ارض ، والأرض دى ارض زراعية وخصبة وكان الرجل مكبر الأرض دى وعاملها للفقراء والمساكين ، وكان بيأكل الفقراء وعايش الراجل دا عشانهم فمات الأب بعد شوية وحلف الاولاد انهم مش هياكلوا الغلابة ولا ثمرة
فكانت النتيجة ان ربنا بعتلهم رسالة ربانية من عنده شديدة .

طب نحكى القصة من الاول :

كان الأب رجل عصامى بدأ من الصفر وبنى نفسه بنفسه وخلف 3 اولاد ذكور ، واشتغل وكبر ونجح الأب وبقى معاه فلوس كتيييييييييييير جدا ، والأب من اليمن من صنعاء ، والأرض على بعد 18 كيلو من صنعاء ، وفى مخطوطات هناك بتتكلم عليها هناك وبتتكلم عن اصحاب الجنة
وهوا بدأ حياته رجل عادى جدا ، فلما الفلوس جت بقت علاقته بالصدقة عالية جدا ، وحب الصدقة بقى كبير عنده جدا ، وبقت الصدقة كل حاجة فى حياته وتغير للاحسن ، لأنه مر مع الصدقة على 5 مراحل وعلى فكرة الصدقة ليها مراحل والراجل دا وصل للمرحلة الخامسة لأقصى درجات الصدقة

المرحلة الأولى :

هوا كان فى الاول فقير مش معاه فلوس فلما جاتله فلوس قال الصدقة والزكاة حق ربنا
تقول الأية فى اللى مش بيطلع الصدقة

يَا أَيُّهَا الَّذِينَ آَمَنُوا إِنَّ كَثِيرًا مِنَ الْأَحْبَارِ وَالرُّهْبَانِ لَيَأْكُلُونَ أَمْوَالَ النَّاسِ بِالْبَاطِلِ وَيَصُدُّونَ عَنْ سَبِيلِ اللَّهِ وَالَّذِينَ يَكْنِزُونَ الذَّهَبَ وَالْفِضَّةَ وَلَا يُنْفِقُونَهَا فِي سَبِيلِ اللَّهِ فَبَشِّرْهُمْ بِعَذَابٍ أَلِيمٍ (34)

صدق الله العظيم

فكل واحد مش بيطلع الصدقة لله ربنا بيبشره بعذاب اليم فبعد المرحلة الأولى ربنا راضى عليه

فبعتله رسائل جميلة فانتقل إلى المرحلة التانية :

لقى ان الفلوس بتزيد بالنفقة وهوا راجل تاجر يمنى فبدأ يفهم ان الفلوس بتزيد كل ما بيطلع لله ، يقول النبى عليه الصلاة والسلام :ما نقص مال من صدقة
فبدأ الرجل يفهم كويس جدا الرسالة من ربنا ولقى فلوسه بتزيد كل ما بيطلع لله
عارفين يا جماعة يعنى ايه كلمة صدقة ؟

كلمة صدقة يعنى انتا مصدق ان ربنا هيرجعلك فلوسك تانى لما تطلعها للفقراء والمساكين
الصدقة برهان فاول مرحلة الصدقة والزكاة حق ربنا ، وتانى مرحلة الفلوس بتزيد كل ما بطلع الصدقة فقام ربنا رضى عليه

فنقله للمرحلة الثالثة :

وهى لذة إسعاد الفقير بدأ الرجل يتذوق لذة إسعاد الفقير ، لذة إبتسامة طفل يتيم او أرملة تدعيله

( يا جماعة والله بجد لذة العطاء احلى من لذة الأخذ بكتير جدا )

فى مقولة جميلة جدا :

( لما نعيش لنفسنا بنتولد صغيرين ونعيش صغيرين ونموت صغيرين ولما نعيش للخير للناس اعمارنا يتمتد بعمر كل واحد بنرسم البسمة والفرحة على وجهه )

وبعدين بدأ الرجل يحس بلذة غير عادية من حلاوة اسعاد الفقراء
يقول النبى عليه الصلاة والسلام :

( السخى قريب من الله قريب من الناس بعيد من النار ، والبخيل بعيد من الله بعيد من الناس بعيد من الجنة ، والجاهل السخى احب إلى الله من العابد البخيل )

فياريت نكون اسخياء مع الفقراء والمساكين

بعد المرحلة الثالثة اتنقل الرجل إلى المرحلة الرابعة :

وهى أن المال مال الله وانا مستأمن عليها فبدأ يفهم أنه مستخلف على المال وان المال ليس ماله انما مال الله ، فلما وصل للمرحلة دى

اتنقل للمرحلة الخامسة والاخيرة :

انا هعيش للعمل الخيرى فى الأرض هعمل مشاريع للغلابة والفقراء وهدور على كل حاجة عشان الغلابة ، وهحط كل فلوسى فى مشروع واحد من اجل الفقراء والمساكين

فالراجل مر على الخمس مراحل كلها :

1 - ان الصدة والزكاة حق ربنا
2 - ان الفلوس بتزيد كل ما بيطلع لله
3 - لذة اسعاد الفقير
4 - انه مستخلف على المال وان المال مال الله
5 - انا هعيش للعمل الخيرى
دول الخمس مراحل اللى مر بيهم الراجل

( وياريت كل واحد بينه وبين نفسه يشوف هوا فى اى مرحلة من دول ونحاول كلنا نوصل للمرحلة الخامسة )

وصل الأب للمرحلة الخامسة :

ولاده مش عاجبهم اللى ابوهم بيعمله فقرر الأولاد انه لو مات ابوهم مش هنكمل اللى بيعمله
فبدأوا يعاملوا الفقراء معاملة وحشة جدا ، ولما ابوهم يكون موجود يعاملوا الفقراء كويس واول ما يمشى يعاملوهم وحش ، وعبوس فى وجه الفقراء والغلابة ويوجعوا الغلابة بكلامهم
مثلا ( مش كفاية انتم بتاكلوا ببلاش وكلام زى كدا )

الأولاد الثلاثة منهم اثنين مش بيسمعوا كلام ابوهم ، والثالث قريب لأبوهم واوسطهم
كل دا بيحصل فى الوقت اللى قرر الأب قرار خطير جدا وعظيم جدا ، قرر الأب انه يضع كل فلوسه فى ارض زراعية كبير واسعة اسمها ( ارض الجنة ) ، وهى بجد عاملة زى الجنة
فيها ما تشتهى الأنفس ، وقرر الأب أنه يشغل اكبر عدد من اهل اليمن ، وقرر انه يوم الحصاء يبقى يوم عيد لأهل صنعاء ، فيبدأ بالفقراء يطلع ليهم الثلث واحلى حاجة بيطلعها ليهم
مش اسوأ حاجة زى ما ناس كتير بتعمل ، فلم يعجب الاولاد اللى بيحصل دا والناس واهل صنعاء من فرحتهم سموها ارض الجنة ، وربنا سماها ارض الجنة

حصل ايه بعد كدا :

فجأة مات الأب قبل الحصاد وساب الأب ارض الجنة وكانت التركة والورث هوا ارض الجنة
فقرر الأولاد قرار خطير جدا ، قرروا ولا مليم بعد ما مات ابوهم يطلعوه للفقراء والغلابة
وجاتلهم فكرة انهم يقطفوا الثمار ويبيعوا المحصول قبل ما الفقراء يعرفوا ويبيعوا الأرض

طب إيه اللى حصل :

حاول اوسطهم تقويمهم لكن هما كانوا اقوى منه فانساق معاهم تقول الأية :
بسم الله الرحمن الرحيم
إِنَّا بَلَوْنَاهُمْ كَمَا بَلَوْنَا أَصْحَابَ الْجَنَّةِ إِذْ أَقْسَمُوا لَيَصْرِمُنَّهَا مُصْبِحِينَ (17) وَلَا يَسْتَثْنُونَ (18) فَطَافَ عَلَيْهَا طَائِفٌ مِنْ رَبِّكَ وَهُمْ نَائِمُونَ (19) فَأَصْبَحَتْ كَالصَّرِيمِ (20)
صدق الله العظيم

لما قرر الاولاد قرارهم وغدرهم بالفقراء وانهم يمنعوا الخير عن الفقراء واتفقوا على الغدر بالفقراء والغلابة وبيتوا نية الغدر فى الليل ، فقام ربنا ارسل على الأرض كلها حريق طائف من عنده وهم نائمون ( سبحان الله ) الجزاء من صنف العمل

هما بيتوا الغدر فى الليل والله عزو جل رد عليهم فى الليل
( اوعوا يا جماعة من ذنوب الليل )
وبعدين ارسل ربنا عليهم الصريم ، ايه الصريم دا ؟

دا حريق ربنا ارسله على الأرض غير خواص الأرص كلها فبعد ان كانت اخصب ارض موجودة فى اليمن ، هذا الحريق غير خواص الأرض كلها فأصبحت لا تصلح للزراعة ليوم القيامة اتحولت الأرض من ارض طينية لأرض صخرية ( سبحان الله ) نوع من الحريق لا نعرفه

خدوا بالكم هم اقسموا بأن يقطعوها فربنا جعلها مقطوعة ليوم القيامة والجزاء من صنف العمل
ياريت كله يدخل على الجروب نفسه دلوقتى ، وانا هوريكم ارض الجنة دى شكلها بقى عامل ازاى بعد ما خانوا ابوهم وبعد غدرهم


شوفتوا يا جماعة الأرض اللى كانت من اجمل البقاع على الأرض تحولت لإيه
وبعدين تقول الأيات :
بسم الله الرحمن الرحيم
فَتَنَادَوْا مُصْبِحِينَ (21) أَنِ اغْدُوا عَلَى حَرْثِكُمْ إِنْ كُنْتُمْ صَارِمِينَ (22) فَانْطَلَقُوا وَهُمْ يَتَخَافَتُونَ (23) أَنْ لَا يَدْخُلَنَّهَا الْيَوْمَ عَلَيْكُمْ مِسْكِينٌ (24) وَغَدَوْا عَلَى حَرْدٍ قَادِرِينَ (25) فَلَمَّا رَأَوْهَا قَالُوا إِنَّا لَضَالُّونَ (26) بَلْ نَحْنُ مَحْرُومُونَ (27) قَالَ أَوْسَطُهُمْ أَلَمْ أَقُلْ لَكُمْ لَوْلَا تُسَبِّحُونَ (28) قَالُوا سُبْحَانَ رَبِّنَا إِنَّا كُنَّا ظَالِمِينَ (29) فَأَقْبَلَ بَعْضُهُمْ عَلَى بَعْضٍ يَتَلَاوَمُونَ (30)
صدق الله العظيم

هما بيتوا الغدر فى اليل وانطلقوا فى سكون قبل ما يصحى الفقراء فلما صحيوا ورأوا الأرض ذهلوا وعرفوا انهم هم المحرومون وليس الفقراء ، فربنا حول أرض الجنة إلى الصريم ، الأرض التى يقال عنها أنها كانت أخصب أرض فى اليمن ومن أجود الأراضى الموجودة فى اليمن
وفى العالم

الأرض يا جماعة تحولت لصخر مدبب لو جيت تمسكه ممكن يوجعكوعشان تتخيلوا ارض الجنة
يقول المفسرين :

( أن المرأة كانت بتشيل الوعاء فوق دماغها وتمشى به لا تشد الثمر ، وتمشى فى ارض الجنة ومجرد انها ما تلمس الشجر يتساقط الثمر فى الوعاء ومن كل انواع الفاكهة ، لأن نية الأب كانت كويسة فكانت النتيجة ان الأرض كانت من اجمل البقاع الموجودة فى الأرض
وسبحان الله الصريم لما اصاب الأرض ، لو دخلت ايدك ما بين الصخور تلاقى رماد
شوفتوا يا جماعة معصية ربنا حولت ارض الجنة إلى ارض صخرية ما بينها رماد فى ليلة واحدة
سبحان الله )

( بالله عليكم يا جماعة خذوا القصة دى عبرة ولا تكونوا زى الاولاد اللى خانوا ابوهم بعد ما مات
تخيلوا بقى حسرتهم وندمهم كل حاجة خسروها فى لحظة شايفين المعصية عملت فيهم ايه
وبالرغم من كل دا لسه برضه فى امل )

ففاق اوسطهم وقال :تقول الأيات
بسم الله الرحمن الرحيم
قَالَ أَوْسَطُهُمْ أَلَمْ أَقُلْ لَكُمْ لَوْلَا تُسَبِّحُونَ (28) قَالُوا سُبْحَانَ رَبِّنَا إِنَّا كُنَّا ظَالِمِينَ (29) فَأَقْبَلَ بَعْضُهُمْ عَلَى بَعْضٍ يَتَلَاوَمُونَ (30) قَالُوا يَا وَيْلَنَا إِنَّا كُنَّا طَاغِينَ (31) عَسَى رَبُّنَا أَنْ يُبْدِلَنَا خَيْرًا مِنْهَا إِنَّا إِلَى رَبِّنَا رَاغِبُونَ (32)
صدق الله العظيم

فاقوا خلاص لكن بعد ما ضاعت منهم الأرض وكل حاجة ، خدوا بالكم مهما كانت الذنوب كبيرة
فلا تيأسوا ربنا غفور حتى لو عندك ايه ، ربنا كبير ويقبل التوبة خلى عندكم امل فى الله
ومش تقولوا مفيش فايدة ، وانا ربنا مش هيغفر ليا لو قلت كدا ما بينك وبين نفسك ، ربنا يغضب جدا لأنك مش مقتنع انه الغفور الرحيم

يا جماعة لو أسات تسعا فأحسن واحدة فالحسنة بعشر امثالها ، وفهم الاولاد الدرس كويس
وكانت رسالة صعبة جدا ليهم
تقول أخر اية :

بسم الله الرحمن الرحيم

كَذَلِكَ الْعَذَابُ وَلَعَذَابُ الْآَخِرَةِ أَكْبَرُ لَوْ كَانُوا يَعْلَمُونَ (33)
صدق الله العظيم

يسوق الله العذاب للناس فى الدنيا عشان يرجعوا لطريقه الصحيح فى الدنيا ودا مش غضب من الله دا حب من ربنا عشان يوجهك للخير ، فالواحد يستحمل من ربنا فى الدنيا ، لأن عذاب الدنيا اهون من عذاب الاخرة

يقول النبى عليه الصلاة والسلام :حصنوا اموالكم بالزكاة

( فياريت يا جماعة نعلم القصة دى لأولادنا واخوتنا ونعمل بيها ونعمل بالأيات فى سورة القلم
ونتعظ من القصة دى ونكون دايما مع الله )

انا خلصت النهاردة
ونلتقى بكرا ان شاء الله