المحاضرة 9 : قصة أصحاب الكهف 1

بسم الله الرحمن الرحيم

لسه عايشين مع قصص القرأن كل يوم قصة جديدة ، وكل يوم بنقرب إلى ربنا اكتر من الاول مع القرأن ان شاء الله
احنا امبارح خلصنا قصة طالوت وجالوت وهدخل فى قصة النهاردة ، ياريت كله يركز معايا لنهاردة

قصة النهاردة قصة شباب فى العشرينات وفكرة القصة ان واحد يتغير واحد بس يحمل الرسالة بتاعت ربنا فيقوم ربنا يغير الدنيا كلها عشانه ، ياريت يا جماعة مش نستهون بأنفسنا ونقول هوا احنا اللى هنغير الكون ، يا جماعة واحد بس يغير فى الدنيا - ربنا يغير الكون عشانه كله
وياريت مش نستهون بالشباب الصغير

طب هل ممكن ربنا يغير الكون كله عشان واحد ؟

اقول طبعا واحد بس يحمل الرسالة فيبقى عشرا والعشرة يبقى 100 ، وال 100 يبقوا 1000
وبعدين يبقوا ألاف

مثال :

سيدنا محمد عليه الصلاة والسلام كان لوحده فى الدنيا كلها حمل الرسالة بكل قوة ، وكان مع الله دايما فأصبح الواحد ملايين بل مليارات ( سبحان الله )

الواحد بقى مليارات وعلى فكرة يا جماعة انا مش بقول قصص او اساطير انا بقول حقائق
لو واحد بس حمل الرسالة وكان مع ربنا ، فربنا يجعل النصر على يديه

قصة النهاردة مش قصة انبياء ولا صحابة ولا اتباع انبياء مباشرة ، لكن هما شباب عاديين جدا ودى هى قوة القصة

( فى مقولة جميلة جدا كن انت التغيرر اللى تحب ان تراه فى العالم )

قصة اليوم شباب عاشوا الفكرة عايزين بلدهم تتصلح وبيحبوا ربنا

طب عددهم قد ايه ؟
6 -7 بس عدد قليل جدا

طب ربنا عمل عشانهم إيه ؟

غير نواميس الكون كله عشانهم

عرفتوا القصة ولا لسه ؟

قصة النهادرة قصة اصحاب الكهف المهم ربنا سماهم فى القرأن فتية ، وفتية عندنا يعنى مراهقين ، وربنا سماهم ( فتية آمنوا بربهم وزدناهم هدى ( ، دول يا جماعة اللى بنقرأ قصتهم كل يوم جمعة فى سورة الكهف

يقول النبى عليه الصلاة والسلام :
( من قرأ سورة الكهف فى يوم الجمعة اضاء له من النور ما بين الجمعتين (
وهنشوف بعد ما هنسمع القصة هل احنا هنكون غاليين عند ربنا ولا لأ ، على فكرة القصة دى معجزة قرآنية ودليل من دلائل نبوة النبى عليه الصلاة والسلام




طب ازاى ؟

قبل ما ادخل هفهمكم حاجة اولا السورة دى مكية نزلت فى مكة والنبى عليه الصلاة والسلام كان فى مكة وكانت قريش وقتها بتكذب النبى ، وكانت تقول عليه مجنون
وبعدين قريش حبت تثبت كلامها على النبى عليه الصلاة والسلام انه كذاب
وما هوا بكذاب عليه الصلاة والسلام ، فأرسلت واحد اسمه النضر بن الحارث عقبة بن ابى معيط
وقالوا لهم : تطلعوا على احبار اليهود فى المدينة
وتقولولهم : يقولوا لنا اى حاجة نسأل فيها محمد عشان لو مش جاوب يبقى هوا مش نبى

( على فكرة يا جماعة النبى عليه الصلاة والسلام عانى كتييييييييييير جدا وتعب كتير جدا
عشان الدين دا يجيلنا على طبق من ذهب )

المهم :

فأحبار اليهود قعدوا يفكروا فى حاجة محدش يعرفها إلا نبى وقعدوا يفكروا كتير
فقالوا لبعضهم : لو جبناله حاجة من التوراة او الإنجيل ممكن يكون حد أطلعه على التوراة او الإنجيل
فقالوا : نجيب حاجة حصلت بعد التوراة والإنجيل
على فكرة قصة اصحاب الكهف حصلت بعد 150 سنة من ميلاد المسيح ، فأكيد هى مش موجودة لا فى التوراة ولا فى الإنجيل
وقالوا : هاتوله وثيقة سرية لا يعلمها احد إلا عدد محدود جدا جدا من الاحبار والرهبان
وميعرفهاش إلا نبى ولو معرفهاش مش يبقى نبى
فقالت الأحبار لقريش :اسألوه عن فتية اختفوا - كم عددهم - واختفوا كام سنة

فراحت قريش للنبى عليه الصلاة والسلام وجمعوا كل مكة وقالوا للنبى :
أخبرنا عن فتية اختفوا - كم عددهم - وكم سنة اختفوا
فالنبى عليه الصلاة والسلام لا يعرف
فقال لهم : سأجيبكم غدا ولم يقل إن شاء الله

فنزلت الأية :

ولا تقولن لشئ إنى فاعل ذلك غدا إلا أن يشاء الله

صدق الله العظيم

وتأخر الوحى بعدها ولم ينزل لمدة 15 يوم وبدأت قريش تشكك فى النبى ، واستمر الحال على هذا لغاية ما نزل الوحى ونزلت الأيات
تقول :
أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آَيَاتِنَا عَجَبًا (9)
إِذْ أَوَى الْفِتْيَةُ إِلَى الْكَهْفِ فَقَالُوا رَبَّنَا آَتِنَا مِنْ لَدُنْكَ رَحْمَةً وَهَيِّئْ لَنَا مِنْ أَمْرِنَا رَشَدًا (10) فَضَرَبْنَا عَلَى آَذَانِهِمْ فِي الْكَهْفِ سِنِينَ عَدَدًا (11) ثُمَّ بَعَثْنَاهُمْ لِنَعْلَمَ أَيُّ الْحِزْبَيْنِ أَحْصَى لِمَا لَبِثُوا أَمَدًا (12) نَحْنُ نَقُصُّ عَلَيْكَ نَبَأَهُمْ بِالْحَقِّ إِنَّهُمْ فِتْيَةٌ آَمَنُوا بِرَبِّهِمْ وَزِدْنَاهُمْ هُدًى (13)
صدق الله العظيم

نزلت الأيات بتحكى لهم سورة اصحاب الكهف وهى من الأية 9 - 30 وربنا حكلنا القصة كلها عشان نتعلم منها ونطبقها فى حياتنا ، وبعدين الله عز وجل فى الأخر بعد نزول الأيات جاوبهم على اسألتهم :

السؤال الأول :

قعدوا قد إيه ؟
فنزلت الأية :
وَلَبِثُوا فِي كَهْفِهِمْ ثَلَاثَ مِئَةٍ سِنِينَ وَازْدَادُوا تِسْعًا (25)
قعدوا فى الكهف 309 سنة

فاحبار اليهود سمعوا الجواب فسكتوا

طب السؤال التانى : عددهم كام
على فكرة الأحبار والرهبان هما مش عارفين ومختلفين فى الأقوال مرة يقولوا 3 - ومرة يقولوا 5 - ومرة يقولوا 7

فربنا رد عليهم وقال لهم :

سَيَقُولُونَ ثَلَاثَةٌ رَابِعُهُمْ كَلْبُهُمْ وَيَقُولُونَ خَمْسَةٌ سَادِسُهُمْ كَلْبُهُمْ رَجْمًا بِالْغَيْبِ وَيَقُولُونَ سَبْعَةٌ وَثَامِنُهُمْ كَلْبُهُمْ قُلْ رَبِّي أَعْلَمُ بِعِدَّتِهِمْ مَا يَعْلَمُهُمْ إِلَّا قَلِيلٌ فَلَا تُمَارِ فِيهِمْ إِلَّا مِرَاءً ظَاهِرًا وَلَا تَسْتَفْتِ فِيهِمْ مِنْهُمْ أَحَدًا (22)
صدق الله العظيم

فلم يرد اليهود بعد جواب الله عز وجل ودا منتهى القوة من الله ومنتهى الدليل على صدق القران – ازاى ؟

اصل هما فى الوثائق اللى عندهم مختلفين على عددهم والقرأن كمنهج جابلهم كل الأرقام اللى هما كانوا بيقولوها ومحدش كان يعرفها غيرهم
ويقول القران فى الأخر ان الغالب انهم 7 ، فاول ما قال النبى عليه الصلاة والسلام هذا الكلام
احبار اليهود وقريش سكتوا ولم يعقبوا ، وان اول من اعلن القصة للعالم هو النبى عليه الصلاة والسلام فالقصة دى من دلائل النبوة للنبى
طب ندخل على جزأية تانية هما تقريبا 6 – 7 من الفتية شالوا الرسالة وحملوها فربنا غيرلهم نواميس الكون

يالا نحكى القصة :

الفتية دول بدأوا بعد المسيح عليه السلام ب 150 سنة وناموا 300 سنة وازيد ب9
فصحيوا سنة 450 يعنى قبل النبى ب 150 سنة ، فهما جم فى النصف ما بين سيدنا عيسى وسيدنا محمد عشان يملأوا الفراغ اللى فى المدة الزمنية دى

طب مين اهل الكهف دول ؟

دول من اتباع المسيح والقرأن بيحكى قصة فتية مسيحيين موحدين بالله ، جايين من اتباع نبى قبله شايفين التعايش

كأن النبى عليه الصلاة والسلام بيقول :
انا مش جاى اهد اللى قبلى ، او اهد الدين اللى قبلى ، انا جاى ابنى وجاى اكمل اللى قبلى
وان النبى عليه الصلاة والسلام هوا الختام ، وربنا بيحب يختم كل اعماله بالحمد لله رب العالمين

هدخل بقى على تفاصيل القصة نفسها :

القصة دى كانت فى الأردن وكان فيها ملك اسمه دقيانوس وكان الملك دا ظالم جدا وظلم البلد كلها وقتل كل اتباع المسيح وكان يقتل كل من يوحد بالله ، ومن يقول لا إله إلا الله ، فأصبح ان مفيش حد فى البلد بيقول لا إله إلا الله ، والناس عايشة فى فقر شديد - وضرائب مهولة
مش عارفة تعيش - ومحدش بقى يقول لا إله إلا الله إلا واحد بس من اتباع المسيح باقى فى المدينة ودقيانوس بيدور عليه ، لأنه اخر واحد من اتباع المسيح فالراجل دا بيبحث عن شباب يكملوا الرسالة من بعده وعارف انه فى وقت من الاوقات هيتمسك لأن جواسيس الملك فى كل مكان ، فقرر الرجل انه يدور على 6 - 7 شباب عشان يوصل الرسالة وبدأ يبحث عن شباب فى المدينة وقدر يجمع 6 -7 شباب وقالوا : لا إله إلا الله
وزرع الإيمان فى قلوبهم لكن جمعهم كل واحد من مكان متفرق ومش لحق يعرفهم على بعض
لأنه جمعهم من اماكن متفرقة وخلاص لسه هيعرفهم على بعض ، وجده جواسيس الملك وتم القبض عليه وقتل فأصبح الشباب دول كل واحد دلوقتى عنده إيمان بس مش عارف يعمل إيه

طب هيحصل إيه ؟

يقول ابن كثير :

أنه فى يوم العيد السنوى اللى بيسجد الناس فيه للألهة وبيقدموا القرابين ، فكل الناس بتطلع فى هذا اليوم وكله طالع هذا اليوم وكان هذا اليوم فى منتهى الإنحراف والإنحلال والمعاصى
وغيرها من الأعمال المحرمة فلم يقدر الأولاد ان يتأقلموا مع هذا الجو ، وكانت فى شجرة بعيدة
وهنا تبدأ قصة التعارف ما بينهم طلع كل واحد من وسط هذا الجو الفاسد ، واتجه إلى الشجرة
وتجمعوا هناك

عايزين تعرفوا انتم ايمانكم قوى ولا لأ ؟

1 – لو فى مكان فاسد انتا قاعد فيه وبتقول ادينى قاعد وقادر تتأقلم على هذا الجو فاعرف ان ايمانك صعيف ، فلو الإيمان عندك كبير مش هتقدر تقعد فى اى مكان فيه معصية الله

يقول النبى عليه الصلاة والسلام :

( الأرواح جنود مجندة فما تعارف منها ائتلف وما تناكر منها اختلف )

شايفين يا جماعة الشجرة جمعتهم ، وكلهم اجتمعوا مع بعض واللى جمعهم إيمانهم القوى
وكرههم للرزيلة ، وبعدين كل واحد سحب نفسه من وسط هذا الجو الفاسد وقعدوا عند الشجرة ، بس هما خايفين من بطش الملك ، وكلهم قاعدين مع بعض ومحدش بيتكلم خالص
لكن هما حاسيين ان فى حاجة واستمر الصمت الطويل ما بينهم

حتى قاطع احدهم الصمت وقال :

والله ما اخرجنى إلا الذى اخرجكم فقولوا ولا يتكلم احدنا على الأخر

( شايفين يا جماعة مدى الخوف كان عامل ازاى وخايفين يقولوا لا إله إلا الله ، طب احنا يائسين ليه - ومش قادرين نصلح ليه - واحنا نتكلم ونصلح فى بلادنا - والشباب هم عصب الامة )

المهم حصل ايه :

فضلوا مترددين وبعدين بدأوا يتكلموا وعرفوا انهم آمنوا بسبب الراجل اللى مات ، وان ربنا جعله سب لإيمانهم فلما لاقوا نفسهم كدا تمسكوا ببعض وجمدوا مع بعض ومن النهاردة هيبدوا مسيرة الإصلاح مع بعض

يبقى اول حاجة قولناها عشان نعرف الإيمان بتاعنا قوى ولا لا :
1 - لو لقيت مكان فاسد تقوم منه
2- الصحبة الصالحة
( كل واحد يشوف مين اصحابه وهتعرفوا ربنا هيثبتكم ولا لأ ، كل واحد يشوف مين اصحابه هيعرف هيتوب ولا لا ، كل واحد يشوف مين اصحابه هيعرف هوا فى طريق الله ولا لا )

وخدوا بالكم ان الصحبة دى هتستمر لمدة 300 سنة وعلى فكرة هم فى صحبة إلى الأن
وقبورهم مع بعض إلى الأن ، وذكرت فى القران كصحبه
فى فكرة يا جماعة الصحبة دى تأثر عليك فى 3 حاجات :

مستقبلك - علاقتك بأهلك - علاقتك بربنا

حصل ايه بعد كدا :

خلاص الشباب اتفقوا انهم يصلحوا فى الأرض وفى البلد :

تقول الأية :

وَرَبَطْنَا عَلَى قُلُوبِهِمْ إِذْ قَامُوا فَقَالُوا رَبُّنَا رَبُّ السَّمَاوَاتِ وَالْأَرْضِ لَنْ نَدْعُوَ مِنْ دُونِهِ إِلَهًا لَقَدْ قُلْنَا إِذًا شَطَطًا (14)
صدق الله العظيم

شوفتوا عملوا ايه :

ربنا ربط على قلوبهم وثبتهم وهما قاموا وهبوا للإصلاح اللى عايز يا جماعة يصلح فى البلد
لازم هبه وقومه يهب ويقوم بس مش هبه وقومه دلوقتى ، وبعد رمضان يكسل ، يبقى رقم 3 اقوم واهب واصلح

( بداية الإيمان شوف نفسك بعد رمضان هتقوم وتنوى تصلح ازاى ، قوموا بقوة النبى عليه الصلاة والسلام يأيها المزمل قم الليل إلا قليلا - يأيها المدثر قم فأنذر ، قوموا بقومة النبى عليه الصلاة والسلام وقوته )

طب رابع حاجة ايه :

تقول الأيه :

هَؤُلَاءِ قَوْمُنَا اتَّخَذُوا مِنْ دُونِهِ آَلِهَةً لَوْلَا يَأْتُونَ عَلَيْهِمْ بِسُلْطَانٍ بَيِّنٍ فَمَنْ أَظْلَمُ مِمَّنِ افْتَرَى عَلَى اللَّهِ كَذِبًا (15)

بحب الناس وعايز اخدمهم واخد بإيديهم واعمل الخير ليهم فانا قلت الأربع حاجات اللى تشوف بينك وبين نفسك انتا ايمانك ، قوى ولا لا

وإيه خطة الشباب دول ؟

بدأ الشباب يحطوا خطة وهى انهم هيساعدوا الناس وهيأكلوا الفقراء الاول عشان يعرفوا ان الخير مازال موجود ووقتها هيبقى سهل نقولهم لا إله إلا الله فيؤمنوا ، فبدأوا ينزلوا للناس الغلابة ويعملوا ليهم مشاريع ، يأكلوهم ، والناس مستغربة هما الشباب دول بيعملوا معاهم كدا ليه

على فكرة الشباب دول فيهم ابن عم الملك ، وعلى فكرة الشباب دول مستويات مختلفة
فيهم الغنى والفقير ، وكان معهم راعى عشان كدا جاء موضوع الكلب وكلبهم باسط ذراعيه
وكان الكلب مع الراعى على طول ، وبدأ يصاحبهم فى كل مكان لأنه حبهم جدا سبحان الله

( تخيلوا كرم ربنا بانه ذكر الكلب فى القران لأنه الكلب اختار الصحبة الصالحة )

على فكرة يا جماعة القصة طويلة واحداثها جميلة جدا فوق ما تتخيلوا ، وبعد ما هخلص القصة دى ان شاء الله ، هتشوفوا الفرق لما تيجوا تقرأوها بعد كدا

طب حصل إيه بعد كدا :

الشباب شغالين بقوة وبدأت الناس تعفرهم وبدأت الناس تحبهم وبدأ الشباب يساعدوا الناس والفقراء ، وجهد ليل ونهار وبدأوا يشتغلوا ليل ونهار والناس عمالة تتأثر بيهم والناس عمالة تحبهم

طب الشباب دول جابوا الطاقة والجهد دا منين ؟

من العبادة والطاعة لربنا

تقول الأية :
نحن نقص عليك نبأهم بالحق إنهم فتية آمنوا بربهم وزدناهم هدى 13

( عبادة وطاعة كتير مع ربنا شوفوا ربنا هيعمل معاكم إيه ، خدوا خطوة يا جماعة وشوفوا ربنا هيقربك منه قد إيه ، بس قربوا منه )

طب حصل إيه بعد كدا :

الناس خلاص بتحبهم جدا والخير انتشر فى البلد والناس اصبحت مؤهلة دلوقتى عشان نشر لا إله إلا الله ولسه هيقول الشباب للناس يحصل إيه ؟

لسه الشباب هيقولوا للناس حصلت حاجة غير متوقعة جواسيس الملك عرفوا ان الولاد دول مؤمنين وموحدين بالله ووصل الخبر للملك ، وجن جنون الملك
وصاح الملك وقال :يقبض عليهم ويقتلوا - او يقولوا انهم تنازلوا عن فكرتهم فيخلى سبيلهم

وفجأة الدنيا اتقلبت واصبح الجنود فى كل مكان حتى فى القصر نفسه فى ناس بتحبهم
واول ما سمعوا ان الملك بيبحث عنهم جروا على الشباب واخبروهم ، فاجتمع الشباب بسرعة عشان يفكروا هيعملوا إيه

خلى بالكم هما عندهم 3 اختيارات :

1- يرجعوا ويقولوا للملك احنا رجعنا عن فكرتنا
2 - يقبض عليهم واللى يحصل يحصل
3 - ندبر مكيدة عنف وان ابن عم الملك يعمل حاجة فى الملك

طب هما عملوا إيه رفضوا الثلاث حلول وطلع واحد فيهم
وقال :فاكرين الكهف اللى روحناه مرة وكنا عايزين نتجمع مع بعض فيه مرة ايه رأيكم نروح هناك
فقالوا : الكهف المخيف اللى على بعد 10 ك برا البلد
فقال لهم : تيجوا نروح الكهف دا ونفكر إزاى هنرجع تانى ونحط خطة
فكان الإعتزال فى الكهف عشان يفكروا هما هيعملوا إيه عشان يرجعوا تانى وهناك ربنا هوا اللى نيمهم 309 سنة
فقال لهم واحد : خلى بالكم انتم لو روحتوا هناك فانت كدا قطعتوا على نفسكم طريق العودة مع الملك وانتم مصرين وبتتحدوه

( على فكرة العبادة والصلاة والقيام اقوى حاجة تعينك على المواقف دى لو اتحطيت فيها )

طب معاكم إيه ؟

مش معاهم حاجة إلا بعض الورقات والعملات ودى اللى هتكشفهم بعد كدا وقرر الشباب انهم يروحوا الكهف وهما طالعين للكهف خايفين ومرعوبين ، خدوا بالكم الكهف مرعب اصلا وفيه العقارب والتعابين ، والكهف اصلا شكله موحش وهما هيقعدوا هناك ، فربنا هيغير نواميس الكون عشانهم وهنعرف ازاى المحاضرة الجاية

وبعدين طلع الشباب للكهف وطلع معاهم الكلب وطالعين للمجهول وقرروا انهم ينتظروا صحيح اوقات الإنتظار بيبقى صعب فى بعض الأوقات لكن التسرع والتهور اصعب منه ، فهما فضلوا الإنتظار وكمان ربنا وقف جنبهم وثبتهم وربط على قلوبهم فى وقت الشدة وازمتهم وثبت اقدامهم

( عايزين ربنا يربط على قلوبكم اعبدوه فى وقت الرخاء يربط على قلوبكم ويثبتكم وقت الشدة )

خلاص اخد الفتية القرار ووصلوا للكهف خلاص ، بالرغم من وحشة المكان وظلمة الكف إلا ان ربنا سماه إيواء فكان الكهف حضن ليهم ازاى

يقول الله عزو جل :

وَإِذِ اعْتَزَلْتُمُوهُمْ وَمَا يَعْبُدُونَ إِلَّا اللَّهَ فَأْوُوا إِلَى الْكَهْفِ يَنْشُرْ لَكُمْ رَبُّكُمْ مِنْ رَحْمَتِهِ وَيُهَيِّئْ لَكُمْ مِنْ أَمْرِكُمْ مِرْفَقًا}

فربنا سمى الكهف إيواء ليهم ( سبحان الله )

( غار حراء كان ضيق وانتشر منه رحمة - غار ثور كان إيواء وانتشر منه رحمة - كهف اصحاب الكهف كان ضيقا وانتشرت منه رحمة ، خدوها حكمة فى حياتكم لما الدنيا تضيق عليك وانتا صاحب خير فربنا من هذا الضيق بيوسعها عليك )

طب ليه ربنا سماها سورة الكهف ؟

الكهف يا جماعة مفترق طرق الكهف رمز ، لأن الكهف اختيار قدامك سكتين هتختار الدنيا ولا هتختار الرسالة ، وكل واحد فى الدنيا ربنا بيبعت فى طريقه حد يقوله اختار ، ويتعرض عليه سكة حق ويتعرض عليه سكة رسالة ، فكل واحد ربنا بيبعتله حد ياخد بإيده فاللى يستغل الفرصة دى فقد فاز ومع الله ، واللى يضيعها فقد ضيع اغلى فرصة فى حياته ، فلما تلاقى ربنا بعتلك فرصة عشان تبقى معاه امسك فيها بكل ما فيك لأن الواحد مش يضمن إذا كانت هتيجى تانى ولا لأ ، ورمضان فرصة يا جماعة عشان الواحد يقرب فيها من ربنا ويعمل الخير

دلوقتى انا هوريكم الكهف عامل ازاى؟

كله يدخل دلوقتى على جروب الصحبة عشان تعيشوا مع الاحداث وتشوفوا الكهف ، دا فى اكتر من كدا بس مش دلوقتى دخل الفتية الكهف شوفتوا الكهف عامل ازاى ، وبعدين دخول الفتية الكهف عشان ربنا يعلمنا ان النصر يأتى من عنده وحده

خدوا كلمة يا جماعة :

لو ربنا مش هيأويكم محدش هيأويكم بعد الله عز وجل

طيب حصل إيه بعد كدا ، عمل ايه الفتية فى الكهف ، والملك حصله إيه ، والناس آمنوا ازاى والدنيا اتغيرت ازاى وايه المعجزة اللى هتحصل دا هقولكم عليه بكرا ان شاء الله فى المحاضرة الجاية

شكرا لك
ما نتحرم من ابداعك
شكرا لطرحك المتميز
اختك في الله
روح الصداقة
^^