أجمل طريقة عملتها في تدميس الفول .. طلع تحفففففة بجد

من طرف **روح الصداقة** الخميس مايو 17, 2012 12:34 am

ازيكوا يا فتوكاتي العسولات..

انا جربت طريقة لتدميس الفول
و عجبتني جدا فقلت أفيدكم بحاجة بدل ما انا عمالة استفيد و بس ( أصلي
بصراحة مش شاطرة أوي ) بس و الله اتغيرت بسبب فتكات .. و لسسسسه كمان ..

المهم ..ندخلللل في الموضوع..

الطريقة دي مجموعة من خبرات زائد افتكاسة من عندي .. و اليكم الخطوات:

1- الفول المنقوع (عملت نص كيلو)نغليه على البوتاجاز .. و بعد عشر دقايق نرمي المية بتاعته لانها بتبقى غامقة ( معلومة من فتوكة هنا ربنا يبارك لها).
2- نلخبط عليه شوية فول مدشوش منقوع .. ( معلومة من جدتي).
3- نحطه في الفوالة ( اناء تدميس الفول) و نحط عليه العصير ده:
جزرتين متقطعين و مسلوقين و نحطهم في الخلاط بميتهم مع حبة طماطم كبيرة او حبيتين طماطم .. ( افتكاسة خاصة)
4- نعصر عليه ليمونة و نحطها بقشرها ( معلومة من حماتي )
5- و نضيف شوية صغيرين اوي من البيكنج بودر ( معلومة مش عارفة منين)
و نسيبه على سخان التدميس .. أو على البوتاجاز( نار هادية جدا و شياطة) ..

و لونه و طعمه بيبقى خطييييييييييييير

و لا عدس و لا كركم .. كل ده جربته قبل كده .. بس الجزر ضربهم كلهم ..

يا رب تعجبكم